2003 වසරේ තිරගත වෙමින් ලොව පුරා අතිශය ජනප්‍රියත්වයට පත් වූ "How to Lose a Guy in 10 Days"ආදර කතා චිත්‍රපටයේ දෙවන කොටස (Sequel) නිෂ්පාදනය කිරීමට කටයුතු සූදානම් වෙමින් පවතින බව හොලිවුඩ් මාධ්‍ය වාර්තා කරයි. අවුරුදු විස්සකට අධික කාලයකට පසුව මෙම චිත්‍රපටයේ දෙවන කොටසක් නිෂ්පාදනය වන බවට ලැබුණු පුවතත් සමඟ සිනමා ප්‍රේක්ෂකයින් සහ රසිකයින් අතර දැඩි උද්යෝගයක් හටගෙන තිබේ.
මෙහි විශේෂත්වය වන්නේ පළමු චිත්‍රපටයේ ප්‍රධාන චරිතය හෙබවූ සුප්‍රකට රංගන ශිල්පිනී කේට් හඩ්සන් (Kate Hudson) මෙහි දෙවන කොටස සඳහා ද එක්වන බවට වාර්තා වීමයි. එහෙත් පළමු චිත්‍රපටයේ ඇය සමඟ රංගනයෙන් එක් වූ මැතිව් මැකෝනගී (Matthew McConaughey) මෙම නිර්මාණයට සම්බන්ධ වන්නේද යන්න පිළිබඳව මෙතෙක් නිල වශයෙන් අනාවරණය වී නොමැත.
චිත්‍රපටයේ පිටපත මේ වන විට සකස් වෙමින් පවතින අතර, එය නූතන ඩිජිටල් යුගයට සහ සමාජ මාධ්‍ය සංස්කෘතියට ගැළපෙන ලෙස නිර්මාණය කිරීමට නිෂ්පාදක කණ්ඩායම අවධානය යොමු කර තිබේ. හොලිවුඩයේ සෞන්දර්යාත්මක ආදර කතා සඳහා නැවතත් ඉහළ ඉල්ලුමක් නිර්මාණය වී ඇති පසුබිමක, මෙම චිත්‍රපටය ද ඉහළ වාණිජ සාර්ථකත්වයක් අත්කර ගනු ඇතැයි සිනමා විචාරකයෝ අනුමාන කරති.
