ජේයි ආකාශ්ගේ අලුත්ම චිත්‍රපටය ශ්‍රී ලංකාවට විශේෂ චිත්‍රපටයක් වන්නේ එය ලාංකික රසිකයින් පිරිවරා සිටින දකුණු ඉන්දීය සිනමාපටයක් හෝ තෙලුඟු, දෙමළ, කන්නඩ, මලයාලම් භාෂාවලින් නිමවන ඉන්දීය තාරකා සම්බන්ධ වන සිනමාපටයක් වීම හේතුවෙන් පමණක් නොවේ. එහි රූගත කිරීම් ශ්‍රී ලංකාවේද සිදු කිරීමට යෙදී තිබීම හේතුවෙනි.
එසේම ගිහානි වීරසිංහ, ජීවන් කුමාරතුංග ඇතුළු ශ්‍රී ලාංකීය තරු රැසක්ද චිත්‍රපටය සඳහා දායක වෙති.
එහි මුහුරත් උළෙල මෑතකදී කොළඹ කේන්ද්‍ර කරගනිමින් පැවැත්වුණ අතර ජනප්‍රිය ඉන්දීය තරු රැසක් ඒ සඳහා දායක වේ.
ඉන්දීය සිනමාවේ චරිතාංග ජ්‍යෙෂ්ඨ නළුවකු වන එම්. නාසර්, විජය කුමාර්, දිව්‍යා, අක්ශිතා, ඇතුළු ජනප්‍රිය දෙමළ සහ තෙලුඟු සිනමාවේ ජනප්‍රිය නළු නිළි පිරිසක් මේ සඳහා රංගනයෙන් දායක වෙති.
චිත්‍රපටය අධ්‍යක්ෂණය කරනු ලබන්නේ ජේ. ආකාශ් විසිනි. 'තව්තිසා පික්චර්ස්' සභාපති මොහාන් පෙරේරා විසින් චිත්‍රපටය නිෂ්පාදනය කරනු ලබයි.
චිත්‍රපටය ඉන්දියාව, ලංකාව, කැනඩාව, එංගලන්තය යනාදී රටවල් කිහිපයක එකවර තිරගත කිරීමට නියමිතය.
මීට වසර කිහිපයකට පෙර මෙහි නළු නිළියන් තෝරාගැනීම යාපනයේදීද සිදු කෙරිණි.
