දැනට ජාතික රූපවාහිනියෙන් විකාශය වන ජනප්‍රියතම වැඩ සටහන වන "පියුම් නීල විල" සඳහා අද ආරාධිත ශිල්පියා ලෙස සහභාගී වන්නේ ජනප්‍රිය ගායන ශිල්පී රූකාන්ත ගුණතිලකයි.
රූකාන්ත සමග චන්ද්‍රලේඛා පෙරේරා, රයිනි, සනුක, වින්ඩි සහ දිල්මින් පෙරේරා යන ගායක ගායිකාවෝ මෙහි ගී ගයති.
සෑම ඉරිදාවකම රාත්‍රී නවයයි තිහට විකාශය වන පියුම් නීල විල දැනටමත් දිවයිනේ රූපවාහිනී නාලිකා සියල්ල අතුරෙන් ප්‍රමුඛස්ථානයක ඇති ප්‍රේක්ෂකයන්ගේ අවධානයට ලක් වූ සංගීත වැඩසටහන ලෙස හඳුන්වා දිය හැකිය.
ශ්‍රී ලංකා රූපවාහිනි සංස්ථාවේ නියෝජ්‍ය අධ්‍යක්ෂ ජනරාල් නිලාර් එන්. කාසිම්ගේ මෙහෙයවීමෙන් පටිගත වන මෙම වැඩසටහනේ අධ්‍යක්ෂවරයා චින්තක අනුරුද්ධ පෙරේරාය.
මෑත අවධියේදී වියළි, අමුතු දොස්තර, ඉරගිනි මද්දහන සහ සිටුවර පුවත වැනි විශිෂ්ට ටෙලිනාට්‍ය රැසක් පෙළගස්වා ඇති ජාතික රූපවාහිනියේ සංගීත රසිකත්වයට පිදෙන උපහාරයක් ලෙස පියුම් නීල විල වැඩසටහන හඳුන්වා දිය හැකිය.
